ဟေ့ ... မြန်မာဟာ မြန်မာပဲ။ မြန်မာဟာ မြန်မာပြည်မှာ နေရမယ်။ မြန်မာပြည်မှာ သေရမယ်။ အကြောင်းအမျိုးမျိုးကြောင့် ရေမြေခြားကိုရောက်နေရပေမယ့် တစ်နေ့မှာ မြန်မာပြည်ကို ပြန်ရမယ်။ အခွင့်အရေး တစ်စုံတစ်ရာကြောင့် နိုင်ငံခြားသားလုပ်ဖို့ ဘယ်တော့မှ စိတ်မကူးလေနဲ့။ (ဦးသန့်)

သူ နဲ့ သူမ

Wednesday, July 23, 2008

သူ
ဘဝကို ပေါ့ပေါ့ပါးပါးလေး ဖြတ်သန်းတယ်။ စိတ်ညစ်စရာ စိတ်ရှုပ်စရာတွေ ကြုံလာရတိုင်း အမြန်ဆုံး မေ့ပစ်နိုင်အောင်ကြိုးစားပြီး နေတတ်တယ်။ သူ့မှာ မာနတွေ ၊
အတ္တတွေ ၊ ပကာသနတွေမရှိဘူး။ စိတ်ကောင်းစေတနာကောင်းရှိတယ်။ အဲဒါကြောင့်ထင်တယ် ။ အချိန်တိုင်း သူ့ကို တွေ့လိုက်ရင် ပြုံးရယ်နေတာပဲတွေ့ရတတ်တယ်။

သူမ
အနေအထိုင်အေးဆေးတယ်။ မိန်းကလေးပီသတယ် ။ သူတစ်ပါးကိုအရမ်း ကူညီတတ်တယ် ။ သူငယ်ချင်း မိဘတွေအပေါ်မှာ အရမ်းသံယောဇဉ်ကြီးတယ် ။
သူမ ချစ်တဲ့သူတွေကို အရမ်းအလေးထား ဂရုစိုက်သလို သူမကိုလည်း ပြန်ပြီးဂရုစိုက်တာလေးတွေလိုချင်တယ်။ သူမချစ်တဲ့သူ တစ်ဦးဦးက သူမကို စိတ်ထိခိုက်စရာ၊ စိတ်မကောင်းစရာတစ်ခုခု ပြောလိုက်တယ်ဆို အရမ်းခံစားနေတတ်တယ်။ ပြီးတော့ မာနရှိတယ်။

သူနဲ့သူမ...မမျှော်လင့်ပဲ သူငယ်ချင်းတွေ ဖြစ်ခဲ့ကြတယ်။ သူ က သူမကို ပျော်အောင်ထားတယ်။ သူမ ခံစားချက်လေးတွေကို နားထောင်ပေးတယ်။ သူကလည်း သူ့ဘဝအကြောင်းတွေ အားလုံး သူမကို ပြောပြတတ်သလို သူမကလည်း ရင်ဖွင့်စရာရှိရင် သူ့ကို ပြောပြနေတတ်ခဲ့တယ်။တစ်စ တစ်စနဲ့ သူတို့ နှစ်ယောက်
ရင်ထဲမှာ သံယောဇဉ်ဆိုတဲ့ ကြိုးလေးတွေကို မသိမသာ ယက်လုပ်နေကြတယ်။ ဖေဖော်ဝါရီ ( ၁၄ ) ချစ်သူများနေ့။ သူငယ်ချင်းတွေအားလုံး ကန်တော်ကြီး
ပန်းခြံထဲမှာ စုံကြမယ်ဆိုလို့ သူတို့နှစ်ယောက်လည်း မယောင်မလည်နဲ့ ရောက်လာခဲ့ကြတယ် ။ကျန်တဲ့ သူငယ်ချင်းတွေအားလုံးက ချစ်သူတွေကိုယ်စီနဲ့မို့ တဝါးဝါး
တဟားဟားနဲ့ ရယ်တဲ့သူကရယ်၊ တိုးတိုး တိုးတိုးနဲ့ တွတ်ထိုးနေတဲ့ အတွဲက တွတ်ထိုး။တစ်ခါတစ်ခါ ချစ်သူမရှိသေးတဲ့ သူတို့နှစ်ယောက်ကို ဝိုင်းစကြနဲ့မို့ သူတို့
သူငယ်ချင်းအုပ်စုလေးက ပျော်စရာကမ္ဘာလေးတစ်ခုဖြစ်နေတယ်လေ။ခဏနေတော့ အတွဲကိုယ်စီ သင့်တင့်လျောက်ပတ်တဲ့ နေရာတွေကို ချီတက်သွားကြတာကြောင့်
သူနဲ့သူမပဲ တိတ်တိတ်ဆိတ်ဆိတ်လေး ကျန်နေခဲ့ကြတယ်။

(သူ) - နင် အားမကျဘူးလား။ အတွဲကိုယ်စီနဲ့ လျှောက်သွားနေလိုက်ကြတာ။
(သူမ) - အမယ် .. ငါ့ကိုလာမမေးပါနဲ့။ နင့်မေးခွန်းကို နင့်ဘာသာပဲ ပြန်ဖြေပါဦး။

(သူ) - ဟားဟ . ငါက မလိုချင်လို့ မထားတာ။ သဘောပေါက်။ နင့်လို ထားချင်ရက်နဲ့ မထားနိုင်တာ မဟုတ်ဘူး။
(သူမ) - ငါလည်း အပူအပင်တွေ မရှာချင်လို့ကို မထားတာ။ နင်သိပါတယ်။ ဆံပင်လေးတစ်ချက် ရမ်းလိုက်ရင် ပြိုဆင်းသွားတဲ့ သူတွေအများကြီးဆိုတာ။

(သူ) - ခေါင်းမှ မလျှော်ပဲ။
(သူမ ) - နင်နော်..နင့်လို အရပ်က ဝိုင်းပြီး ရေချိုးပေးမှ ချိုးတဲ့သူများ မှတ်နေလား။
......................

တစ်ယောက်နဲ့တစ်ယောက်စနေရင်းကနေ သူက သူဖတ်ဘူးတဲ့ တယ်လီပသီ( telepathy ) ဆိုတာ ယုံကြည်သင့်တယ်ဆိုတာမျိုး၊ ဆိုက်ကိုနဲ့ ဆိုင်တဲ့ လိုဘမပြည့်တာတွေ၊ နူရိုးဆစ်ရောဂါအကြောင်းတွေ သူမကိုပြောပြ၊ သူမကလည်း အခု ဘယ်သင်တန်းတွေ တက်ပြီးလို့ ဘယ်သင်တန်း ထပ်တက်ဖို့လုပ်နေတဲ့ အကြောင်း၊ သူမ ကြိုက်တဲ့ မင်းသား ရီဝေယံ ဖုန်းနံပတ်က ဘယ်လောက်ဆိုတာတွေ ပြောရင်း အချိန်တွေဖြုန်းရင်းနဲ့ သူငယ်ချင်းတွေ ပြန်အလာကို စောင့်နေကြ
တယ်။

(သူ) - နင်က အခုလို အနီးကပ် သေသေချာချာ ကြည့်တော့ ချစ်စရာလေးပဲဟ။
(သူမ) - ဟင်..ဘာမှလည်း မဆိုင်ဘူး။

(သူ) - အကောင်းပြောတာပါ။ နင်က ချစ်ဖို့ကောင်းတယ်နော်။ နောက်နေ့ ငါ့ကို မုန့်လိုက်ကျွေး။ ( ဟီးဟီး )
(သူမ ) - တော်ပြီ..နင့်ကို မခေါ်တော့ဘူး။
.......................

အဲညက သူဘယ်လိုမှ အိပ်မပျော်ခဲ့ဘူး။ သူမနဲ့ ဒီနေ့လိုမျိုး အနီးကပ် စကားတွေအကြာကြီးမပြောဘူးလို့ထင်တယ်။အိပ်မရတာနဲ့ သူမဆီ ဖုန်းကောက်ဆက်လိုက်တယ်။
.......................

(သူ) - ဟဲလို ... နင်လား ၊
(သူမ) - နင်မဟုတ်ဘူး ... ငါ ။

(သူ) - အိပ်မရလို့ နင့်ဆီ ဖုန်းဆက်လိုက်တာ ၊ ပြီးတော့ နင့်ကိုလည်း အရမ်းသတိရနေလို့ဟ။ ငါပြောတဲ့ တယ်လီပသီအရဆို နင်လည်း င့ါကို သတိရနေမယ်
ထင်တယ်။
(သူမ) - ဟင် ... ဘာမှလည်း မဆိုင်ဘူး။
.......................

အဲနေ့ညက သူ ...သူမကို ချစ်တယ်လို့ propose လုပ်ဖြစ်သွားတယ်။ သူ့ကိုသူ အဲလောက်မြန်မြန်ကြီးပြောဖြစ်ခဲ့မယ်လို့ မထင်ခဲ့ဘူး။ပြောပြီးမှ သူမစိတ်ဆိုးသွားပြီလား။
သူ့ကို မခေါ်တော့ဘူးလား ဆိုပြီး စိုးရိမ်လာပြန်ရော။ဘယ်လိုက ဘယ်လိုပြောမိသွားတယ်မသိဘူး။ဒါပေမဲ့ ပြောတော့ပြောချလိုက်ပြီ။ ငါပြောလိုက်တာ စောများစောနေ
မလား။ နောင်လည်း ပြောမယ့်အတူတူကောင်းပါတယ်လေ။ ငါ့အချစ်ကို ဘယ်လို ထင်သွားမလဲ။ အတွေးပေါင်းများစွားနဲ့ တစ်ယောက်တည်း မေးခွန်းတွေထုတ်
တစ်ယောက်တည်း ဖြေ(အကောင်းဘက်ကိုတွေးပြီး) နဲ့ တော်တော်တော့ မောတယ်။

.......................

သူမ တစ်ယောက်လည်း သူ့လိုပဲ တွေးနေခဲ့မိတယ်။ သူ့ဆီက ချစ်တယ်ဆိုတဲ့ စကားကြားလိုက်ရတော့ ထူပူသွားပြီး၊ ရှက်မိတယ်။ သူ့ဆီက အဲဒီလို
စကားပြောလာလိမ့်မယ်လို့ ထင်မထားခဲ့မိဘူးလေ။ သူ...အဲလိုပြောဖြစ်အောင် သူမကပဲ အနေအထိုင် မတတ်ခဲ့လို့လား ဆိုပြီးလည်း ကိုယ့်ကိုယ်ကို ပြန်မေးရင်း
သူနဲ့တွေ့ဖို့ ကို ကြောက်နေမိခဲ့တယ်။

.......................

နောက်နေ့သူဖုန်းဆက်တော့ မိန်းကလေးတွေရဲ့ ရိုးရာလက်သုံးစကားဖြစ်တဲ့ စဉ်းစားပါရစေဦးဆိုတဲ့ စကားပဲ ပြောဖြစ်ခဲ့တယ်။

.......................

မကြာပါဘူး။ သူ တဂျီဂျီ တဂျောင်ဂျောင်နဲ့ ဈေးဆစ်လွန်းလို့ ( သူမကလည်း ချစ်နေပြီကိုး ) ၁နှစ် နေမှ အဖြေပေးမယ်ကနေ နောက်၆လ အကြာမှာပဲ သူ့ကို ချစ်တယ်လို့ အဖြေပြန်ပေးခဲ့တယ်။အဖြေရတဲ့ ညမှာပဲ ဖုန်းအကြာကြီးပြောဖြစ်ခဲ့ကြတယ်။ သူဆိုတဲ့ကောင်ကလည်းဘယ်တုန်းကတည်းက ပြောမယ်ဆိုပြီး
ကြိမ်းဝါးထားတယ် မသိဘူး။ ဒီနေ့မှ အဖြေရတယ်။ ကလေး ၃ ယောက်က ယူပြီးနေပြီ။သူမက မပြောပါနဲ့ဆိုတာကို မရတော့ဘူး။

"ငါတို့တွေ တစ်ယောက်နဲ့ တစ်ယောက် ဘယ်အရာမဆိုပွင့်လင်းကြမယ်နော်။ ပြီးတော့ တစ်ယောက်ကို တစ်ယောက်လည်း အတတ်နိုင်ဆုံး နားလည်ပေးရမယ်။
အော်..နောက် ၃ နှစ်ကြာရင် ငါတို့တွေ လက်ထပ်ကြမယ်နော်။ ဒါမှ မွေးလာတဲ့ သားသမီးတွေကို ကောင်းကောင်းပြုစုပေးနိုင်မှာဟ။ ငါတို့ လက်ထပ်တာ ၂၆ပဲထား။
တစ်ယောက်နဲ့တစ်ယောက်၂ နှစ်ခြားမွေးရင် ငါတို့ ၃၂ နှစ်မှ အငယ်ဆုံးလေး မွေးမယ်။ နောက် ၁၅ နှစ်ဆိုမှ အငယ်ဆုံးလေးက ၁၀တန်းအောင်မှာဆိုတော့ ငါတို့က
အသက်၅၀နားကပ်နေပြီ။ သူတို့ဘဝတွေ ကိုယ့်ခြေထောက်ကိုယ်ပေါ် ရပ်တည်နိုင်တဲ့အထိ ငါတို့က လုပ်ပေးရမှာလေ။ အသက်တွေကြီးနေရင် မကောင်းတော့ဘူး"

သူပြောချင်တာတွေပဲ ဇွတ်ပြောသွားတယ်။ တစ်ဘက်က သူမ တစ်ယောက်မှာတော့ ရှက်လို့ မျက်နှာလေးနီရဲနေသလို၊ သူ့ရဲ့ အလေးထားမှုလေးတွေကိုလည်း သဘောကျနေတယ်ဆိုတာတောင် မသိရှာဘူး။

........................

သူတို့ ချစ်သူနှစ်ယောက်ရဲ့ ချစ်သူဘဝလေးက အရမ်းကို ပျော်စရာကောင်းတယ်။ သူကလည်း သူမကို အရမ်းဂရုစိုက်တယ်။ ကြင်နာတယ်။ အဲဒီ ကြင်နာယုယမှုလေး
တွေ အပေါ်မှာ သူမလည်း ကျေနပ်ခဲ့တယ်။ သူ ခဏ ခဏ သူမကိုပြောတယ် မိန်းမဆိုတာ အားငယ်သင့်တဲ့ နေရာမှာ အားငယ်ရမယ်။ မှီခိုစရာရှိရင် မှီခိုရမယ်။
ဝမ်းနည်းစရာ ရှိလာရင်လည်း မိန်းကလေးဆန်ဆန် ငိုတတ်ရမယ်တဲ့။ သူက အဲလို မိန်းမဆန်တဲ့ မိန်းကလေးမျိုးမှ ကြိုက်တာတဲ့။ သူဘာဖြစ်လို့ ပြောတယ်ဆိုတာ
သူမ သိတာပေါ့ ။ သူမမှာ မာနရှိတယ်။ ဘယ်တော့မှ သူများကို အားမကိုးဘူး။ ဘာမဆို ကြံ့ကြံ့ခိုင်နိုင်လို့လေ။ဒါပေမဲ့ သေချာတာ တစ်ခုကတော့ သူ့ကို ချစ်ပြီးတဲ့
နောက်ပိုင်းမှာ သူမ ပိုပိုပြီး အားငယ်လာတယ်။ မှီခိုချင်လာတယ်။ ဝမ်းနည်းတတ်လာတယ်။ ဒါတွေဟာ သူပြောတဲ့ မိန်းမဆန်တဲ့ မိန်းမတစ်ယောက်တဲ့လား။ သေချာမသိပေမဲ့ သူမ ပြောင်းလဲလာတာတော့ အမှန်ပဲ။

........................

သူမကလေ သူ့ဆီကနေ အချိန်တိုင်း ဂရုစိုက်နေ ကြင်နာနေတာလေးတွေကို လိုချင်တယ်။ တစ်ခါတစ်လေ သူက သူမကို ဂရုမစိုက်ပဲ ပြစ်ထားတယ်လို့ ထင်ရင် တစ်ယောက်တည်း စိတ်မကောင်းဖြစ်နေတတ်ရော။ ပြီးတော့ သူမက အရမ်း စိုးရိမ်တတ်တော့၊ သူ...ညတွေမအိပ်ပဲ ဂိမ်းတွေကစားနေတယ်လို့ ပြောလာရင်လည်း
သူ့အတွက် စိုးရိမ်ရပြန်တယ်။ အဆိုးဆုံးက သူမချစ်တဲ့ သူ့ကို အရမ်းသဝန်တိုတတ်ခြင်းပဲ။ ပြီးတော့ သူမအတွက် စိတ်မကောင်းဖြစ်စရာ တစ်ခုက ပြောပြီးသား စကားကို သူ အလေးမထားတတ်ခြင်းလေ။ အဲဒါတွေက သူ့ စိတ်ထဲမှာ သူမကို ဘယ်နေရာမှာထားတာလဲ၊ တစ်ကယ်ရော သူမဆိုတာ ရှိရဲ့လားဆိုတဲ့ အတွေးတွေ
ကို ဖြစ်စေခဲ့တယ်။ ဒါပေမဲ့...သူ့ကို သူမ အရမ်းချစ်ပါတယ်။ သူက လွဲပြီးရင်လည်း ဘယ်သူ့ကို မှ ချစ်လာနိုင်မှာ မဟုတ်တော့ဘူးဆိုတာလည်း သူမကို သူမ
အသေအချာ သိပါတယ်။ ဘာပဲပြောပြော သူမ အတတ်နိုင်ဆုံး နားလည်ပေးရမှာပေါ့လေ။

........................

သူလည်း သူမကို အရမ်းချစ်တာပဲလေ။ ဒါကြောင့် သူချစ်တဲ့ သူမကို သူဘာလုပ်လုပ် ပြန်ပြန်ပြောပြတတ်တယ်။ ဂိမ်းတွေကို ညလုံးပေါက်ကစားတာ၊ ဆေးလိပ်ကို
ဖြတ်လို့မရသေးတာ၊ သူနဲ့ ခင်တဲ့ ကောင်မလေးနဲ့ စကားပြောခဲ့တာတွေက အစ သူမကို ပြန်ပြောပြတတ်ပြီး သူမ မကြိုက်ဘူးဆိုပြန်တော့လည်း နောက်မလုပ်တော့
့ပါဘူး ဆိုပြီး ကတိတွေပေးမိပြန်ရော။ ဒါပေမဲ့ အဲ ကတိအတိုင်းတော့ သူမနေခဲ့ပါဘူး ။ အဲဒါ သူမကို မချစ်လို့ မဟုတ်သလို အလေးမထားလို့လည်း မဟုတ်ပါဘူး။
အဲဒါက သူ့ရဲ့ အကျင့်အတိုင်း လွတ်လပ်စွာနဲ့ ပေါ့ပေ့ါပါးပါးနေလိုတဲ့ စိတ်ကြောင့်ဖြစ်သလို ချစ်သူဖြစ်တဲ့ သူမအပေါ်ဖြစ်လို့လည်း သူ့စိတ်ရင်းအတိုင်း ဆက်ဆံမိခဲ့တာ။
အခြားသူတွေ အပေါ်မှာတော့ သူ ပြောခဲ့တဲ့ စကားတိုင်းကို ဘယ်တော့မှ မချိုးဖောက်ခဲ့ပါဘူး။ သူ့မှာ အကျင့်တစ်ခုရှိတယ်။ အဲဒါ သူ့ကို အထင်သေးတဲ့ သူ၊ ဆူပူတဲ့ သူ၊ မယုံကြည်တဲ့ သူဆိုရင် အဲဒီသူ ရှေ့မှာ ပို အရွဲ့တိုက် နေတတ်ပြီး၊ တစ်ဘက်ကနေ အဲဒီလူ မသိအောင် ကြိတ်ပြီး ကြိုးစားတတ်တာ။ သူ ငယ်ငယ်က စာမကျက်လို့ မိဘတွေက ဆူတယ်၊ ပြောတယ်၊ နာအောင်တစ်မျိုး၊ မခံချင်အောင်တစ်သွယ် ပြောရင် စာမကျက်ပဲ အိပ်ပစ်တတ်တယ်။ ဒါပေမဲ့ ထင်သလို မဟုတ်ပါလားဆိုတဲ့ အတွေးမျိုး တစ်ချိန်မှာ ဝင်လာအောင် မိဘတွေ အိပ်ပြီဆိုရင် စာထကျက်တတ်တယ်။

.........................

သူမ ပိုပိုပြီး စိတ်မကောင်းဖြစ်ရတယ်။ သူ့ဆီက နောက်မလုပ်တော့ပါဘူး။ ကတိပေးတယ်နော်လို့ ပြောခဲ့တုန်းက ကြည်နူးရတာလေးတွေက ဘယ်လောက်မှ မကြာ
သေးဘူး။ သူ တစ်ခုမဟုတ်တစ်ခုတော့ ဖျက်လိုက်တာပဲလေ။ ဆေးလိပ် ပြန်သောက်ရင် သောက်တယ်။ ဂိမ်းပြန်ကစားရင် ကစားတယ်။ သူ့ သူငယ်ချင်းကောင်မလေး
နဲ့ စကားပြန်ပြောရင် ပြောတယ် ။ ကြာတော့ သူမမှာ ဘယ်လိုမှ ခံနိုင်စွမ်းမရှိတော့ဘူး။

..........................

သူမဆီက သူ လုံးဝ မျော်လင့်မထားတဲ့ စကားကြားခဲ့ရတယ်။

( သူမ ) နင်.. ငါ့ကို တစ်ကယ်ရော ချစ်ခဲ့တာလား။
( သူ ) ဟာ...

သူ့ ရင်ထဲမှာ တော်တော်လေး စိတ်မကောင်းဖြစ်သွားတယ်။ "ဘာဖြစ်လို့များ ငါ အရမ်းချစ်ရတဲ့ နင့်ဆီက အခုလို စကားမျိုး ပြောထွက်လာရတာလဲ။ ငါ့ အချစ်အပေါ်မှာ ထားတဲ့ နင့်ရဲ့ ယုံကြည်မှုက အဲလောက်ပဲလား ဟာ။ လူတစ်ယောက်ဘဝမှာ တန်ဘိုးအရှိဆုံးက ယုံကြည် စိတ်ချရမှုပါ။ အခုတော့ သွားပြီပေါ့။ တစ်ခြားသူတွေမဟုတ်ပဲ
နင် ကိုယ်တိုင်က ငါ့အချစ်ကို မယုံကြည်ဖြစ်ခဲ့လို့ အခုလို မေးလာတယ်ဆိုတော့..........သွားပြီပေါ့ ...............ငါ ချစ်ခဲ့တဲ့ အချစ်တွေ အာလုံး ..............။
နင်မေးတဲ့ မေးခွန်းကို ငါပြန်ဖြေလို့ ရပါတယ်။ နင့်ကို ငါတစ်ကယ်ပဲ ချစ်တာပါလို့။"

ဒါပေမဲ့..........

သူမ မေးတဲ့ မေးခွန်းကို သူ့ဆီကနေ ပြင်းထန်တဲ့ စကားလုံးတွေနဲ့ ငြင်းချက်ထုတ်လာမယ်လို့ သူမ မျှော်လင့်တကြီး စောင့်နေခဲ့မိတယ်။ "ပြောလိုက်ပါလားဟာ နင့်ကို
ငါ အရမ်းချစ်တာပါလို့၊ နင် ဘာဖြစ်လို့ ဆွံအနေရတာလဲ၊ တစ်ကယ်ပဲ နင်ငါ့ကို မချစ်ခဲ့တာလား "

( သူ ) နင်...ဘာဖြစ်လို့ အဲလို မေးခွန်း မေးရတာလဲ။
( သူမ ) မိန်းကလေး တစ်ယောက်အနေနဲ့ ကိုယ်နဲ့ လက်တွဲမယ့် ချစ်သူက ကိုယ့်ကို တစ်ကယ်ချစ်ရဲ့လား၊ ဘယ်လောက် အလေးထားလဲဆိုတာ အရေးကြီးတယ်လေ။
ပြီးတော့ တစ်ကယ်မချစ်ပဲ နဲ့ သိက္ခာတရားကြောင့်၊ စောင့်စည်းရမယ့် ကျင့်ဝတ်တွေကြောင့် ချစ် ဟန်ဆောင်ပြီး လက်တွဲသွားမယ့် အချစ်မျိုးကို အရမ်းမုန်းလို့ မေးလိုက်တာပါ။
( သူ ) အော်....

.......................

" မေမေ "
" အော် .. သား ကျောင်းက ပြန်လာပြီလား။ အင်္ကျီအဝတ်အစားလဲ၊ ပြီးရင် ဒီနေ့ဘာတွေ သင်ခဲ့တယ်ဆိုတာ မေမေ့ကို ပြောပြနော် "

အချိန်ကာလတွေ ပြောင်းလဲလာတာနဲ့ အမျှ အရာအားလုံးလည်း ပြောင်းလဲသွားကြတာပါပဲ။ သူမတစ်ယောက်လည်း အခုဆို ချစ်စရာကောင်းတဲ့ သားလေးရယ်၊
သူမအပေါ်မှာ ဂရုစိုက်ပြီး၊ အရမ်းချစ်တတ်တဲ့ လက်တွဲဖော်တစ်ယောက်နဲ့အတူ ပျော်စရာကောင်းတဲ့ မိသားစုဘဝလေးကို ပိုင်ဆိုင်နေပါပြီ။

.......................

ကန်တော်ကြီးပန်းခြံရဲ့ တစ်နေရာမှာတော့ တည်ငြိမ်ပြီး ရင့်ကျက်နေတဲ့ လူတစ်ယောက် မြက်ခင်းပြင်ပေါ်မှာထိုင်ပြီး ပြာလဲ့နေတဲ့ ကောင်းကင်ကြီးကို မော့ကြည့်နေခဲ့
တယ်။

" တခဏတာ တိမ်မဲတွေ ဖုံးလွမ်းနေလို့
ပြာလဲ့ ကြည်လင်နေတဲ့ ကောင်းကင်ကြီးရဲ့
အလှကို..... မတွေ့ရပေမဲ့.....
ထာဝရအတွက်တော့ ဖုံးကွယ်နိုင်စွမ်း မရှိပါဘူး။

အမှန်တရားတစ်ခုကို တွေ့မြင်နိုင်ဖို့အတွက်
အချိန်တစ်ခုတော့ စောင့်ပေးပါ။

အမှန်တရားကို သိလာတဲ့ တစ်နေ့
မင်း... နောင်တရမှာ ဆိုးလို့ပါ။

ကောင်းကင်ကြီးကို ယုံကြည်တယ်ဆိုရင်ပေါ့ "



AddThis Social Bookmark Button


Design by Amanda @ Blogger Buster